2Ch 25 | NdeIBE | STEP | U-Amaziya wayeleminyaka engamatshumi amabili lanhlanu ubudala ekubekweni kwakhe ukuba yinkosi, njalo wabusa eJerusalema okweminyaka engamatshumi amabili laficamunye. Ibizo likanina linguJehowadini evela eJerusalema.

2 Chronicles 25

U-Amaziya iNkosi YakoJuda

1 U-Amaziya wayeleminyaka engamatshumi amabili lanhlanu ubudala ekubekweni kwakhe ukuba yinkosi, njalo wabusa eJerusalema okweminyaka engamatshumi amabili laficamunye. Ibizo likanina linguJehowadini evela eJerusalema. 2 Wenza ukulunga emehlweni kaJehova, kodwa kakwenzanga ngenhliziyo yakhe yonke. 3 Kwathi umbuso wakhe usuqinile, wabulala izinceku zakhe ezazibulele inkosi uyise. 4 Kodwa amadodana azo kawabulalanga, wenza okuseMthethweni, eNcwadini kaMosi, lapho uJehova wapha umlayo wathi: “Oyise kabayikubulawa ngenxa yabantwababo, labantwababo kabayikubulawa ngenxa yaboyise; ngulowo lalowo uzafela izono zakhe.”

5 U-Amaziya wabuthanisa abantu bakoJuda wabamisa ngezindlu zabo bephethwe yizinduna zezinkulungwane lezamakhulu kwelakoJuda lelakoBhenjamini. Wasebutha kusukela kwabaleminyaka engamatshumi amabili kusiya phezulu, wafumana beyizinkulungwane ezingamakhulu amathathu, amadoda akhethiweyo, angaphuma impi, angahloma ngemikhonto langezihlangu. 6 Wabuya waqatsha ko-Israyeli amaqhawe alamandla ayizinkulungwane ezilikhulu ngamathalenta esiliva alikhulu.

7 Kodwa kwafika kuye inceku kaNkulunkulu yathi: “Mayuyu nkosi, amabutho ako-Israyeli la akufanelanga aphume impi kanye lawe – ngoba uJehova kakho kwabako-Israyeli, kakho lakubani ebantwini bako-Efrayimi. 8 Loba ungaze uhambe uyekulwa ngesibindi empini, uNkulunkulu uzakuchitha phambi kwesitha ngoba uNkulunkulu ulamandla okukusiza loba ukukuchitha.”

9 U-Amaziya wasebuza inceku kaNkulunkulu wathi, “Pho ngizakuthini ngamathalenta alikhulu engiwabhadalele amabutho ako-Israyeli?” Inceku kaNkulunkulu yaphendula yathi, “UJehova angakunika okunengi kakhulu kulalokho.”

10 U-Amaziya wawakhulula amabutho ayevela ko-Efrayimi wathi kawabuyele kibo. Lokhu kwawathukuthelisa amabutho abazondela ababoJuda abuyela kibo ngokufuthelana okukhulu.

11 U-Amaziya wasequnga isibindi, waphuma lamabutho akhe, waya eSigodini seTshwayi, lapho abulala khona amadoda aseSeyiri ayizinkulungwane ezilitshumi.

12 Ibutho lakoJuda lathumba amadoda ayizinkulungwane ezilitshumi ephila, lawaqhuba layawafikisa engqongeni yeliwa lapho awaphosela khona phansi aphahlazeka wonke aba yizicucu.

13 Kwathi amabutho ayebuyiselwe emuva ngu-Amaziya ngoba engasafuni ukuthi amlwele impi, ahamba ehlasela imizi yaseSamariya laseBhethi Horani kwelakoJuda. Abulala abantu abayizinkulungwane ezintathu njalo athutha impango enengi kakhulu.

14 U-Amaziya wathi esevela bulala ama-Edomi wabuya ethwele onkulunkulu babantu baseSeyiri. Wabamisa baba ngonkulunkulu bakhe wakhothama kubo wanikela imihlatshelo yokutshiswa. 15 Ulaka lukaJehova lwavutha wathukuthelela u-Amaziya, wasethuma umphrofethi owafika wambuza wathi, “Kungani udinga uncedo kubonkulunkulu balababantu na, abehluleka ukuvikela abantu babo ekubahlaseleni kwakho?”

16 Wathi esakhuluma, inkosi yathi kuye, “Sikubekile yini ukuba ngumcebisi wenkosi na? Thula! Kungani udinga ukubulawa na?” Ngakho umphrofethi wema kodwa wasesithi, “Ngiyakwazi ukuthi uNkulunkulu uzimisele ukuthi akubhubhise, ngoba lokhu akwenzileyo kutsho ukuthi awuzange ulalele ukucebisa kwami.”

17 Ngemva kokuba u-Amaziya inkosi yakoJuda eseke wabuza abacebisi bakhe, wathumela ilizwi kuJehowashi indodana kaJehoyahazi, indodana kaJehu, inkosi yako-Israyeli wathi: “Woza, siqondane ubuso ngobuso.”

18 Kodwa uJehowashi inkosi yako-Israyeli waphendula u-Amaziya inkosi yakoJuda wathi: “Isihlahla sameva saseLebhanoni sathumela umbiko kwesomsedari waseLebhanoni sathi: ‘Yendisela indodakazi yakho endodaneni yami ibe ngumkayo.’ Ngakho kwavela isilo saseLebhanoni sanyathela safohloza isihlahla sameva. 19 Uzitshela ukuthi usunqobe ele-Edomi, khathesi usuqholoza uziqhenya. Kodwa hlala ekhaya! Kungani uzibangela uhlupho oluzakuchitha luze luchithe loJuda na?”

20 Kodwa u-Amaziya kazange alalele ngoba uNkulunkulu wayekumisile ukuthi uzabanikela kuJehowashi, ngenxa yokukhonza kwabo onkulnkulu bama-Edomi. 21 Ngakho uJehowashi inkosi yako-Israyeli wasehlasela. Yena kanye lo-Amaziya inkosi yakoJuda baqondana ubuso ngobuso eBhethi Shemeshi koJuda.

22 AbakoJuda bahlakazwa ngabako-Israyeli kwaba yileyo laleyo indoda yabaleka yaqonda emzini wayo. 23 UJehowashi inkosi yako-Israyeli wathumba u-Amaziya inkosi yakoJuda, indodana kaJowashi indodana ka-Ahaziya, eBhethi Shemeshi. Ngakho uJehowashi waya laye eJerusalema njalo wadiliza umduli weJerusalema kusukela eSangweni lika-Efrayimi kusiya eSangweni laseJikweni isibanga esingaba ngamanyathelo angamakhulu ayisithupha ubude baso. 24 Wasethatha lonke igolide lesiliva lazo zonke izimpahla azifumana ethempelini likaNkulunkulu ezazilindwe ngu-Obhedi-Edomi, kanye leziligugu zenotho yesigodlweni lezithunjwa, wasebuyela eSamariya.

25 U-Amaziya indodana kaJowashi inkosi yakoJuda waphila okweminyaka elitshumi lemihlanu ngemva kokufa kukaJehowashi indodana kaJehoyahazi inkosi yako-Israyeli.

26 Ezinye izehlakalo ngombuso ka-Amaziya, kusukela ekuqaleni kuze kube sekupheleni, azilotshwanga yini egwalweni lwamakhosi akoJuda lako-Israyeli na? 27 Kusukela ekuphambukeni kuka-Amaziya engasalandeli uJehova, bamsongela eJerusalema wabalekela eLakhishi, kodwa bathumela amadoda amlandela eLakhishi ambulalela khonale.

28 Wabuyiswa esethwelwe ngebhiza wangcwatshwa labokhokho bakhe eMzini kaJuda.